Desempleo

Hopi biaha ora ta papia tocante personanan cu no tin trabou, ta haci uzo di e palabra desempleo. Sinembargo, no ta tur persona sin trabou ta conta oficialmente como un persona desemplea.

Definicion di desempleo

E Organisacion Internacional di Labor (ILO) ta defini personanan den 'desempleo' como “Tur persona di edad laboral, cu no tin trabou, ta buscando trabou, y ta disponibel pa traha (durante un periodo specifica)”.

Esaki ta significa cu, pa e periodo en cuestion, un persona ta wordo oficialmente considera desemplea (segun e definicion di ILO) ora cu simultaneamente:

• E persona ta di edad laboral: ILO ta defini e edad laboral como 15 aña bay ariba. E edad laboral por varia entre diferente pais, debi cu por inclui un edad maximo tambe, por ehempel, e edad di pensioen. Tambe sa permiti personanan mas hoben pa traha, bou di cierto condicionnan y restriccionnan.
• E persona no tin trabou: E persona no tin un trabou pa cual e ta ricibi un salario en cambio y tampoco e ta emplea ariba su mes. ILO ta rekeri e minimo di un ora di trabou en cambio di salario of ganashi pa considera un persona como emplea.
• E persona ta buscando trabou: E persona mester ta activamente buscando trabou, door di, por ehempel, ta aplicando na diferente compania of ta aplicando pa permisonan y recursonan pa establece su propio compania.
• E persona ta disponibel pa traha: E persona mester ta disponibel pa traha of pa cuminsa su mesun compania.

Clasificacion di desempleo

Desempleo por wordo clasifica den:

• Desempleo ciclico: Desempleo ciclico ta resulta door di cambionan den actividad economico over di e ciclo comercial. Ora cu tin caida den actividad economico, e bahada den demanda pa productonan y servicionan por pone cu companianan ta reduci e cantidad di personanan cu nan ta emplea. Tambe companianan por bira mas cauteloso pa emplea trahadonan nobo. Consecuentemente, tin menos cupo di trabou disponibel, y ta relativamente mas dificil pa esnan cu ta buscando trabou pa haya esaki. E situacion contrario ta sosode ora cu tin crecemento den actividad economico.
• Desempleo structural: Desempleo structural ta resulta door di incompatibilidad entre e cuponan di trabou disponibel y personanan buscando trabou. Esaki por pasa, entre otro, ora cu personanan buscando trabou no ta dispone di e habilidadnan rekeri pa por haci e trabounan cu tin disponibel. Por ehempel, debi na avancenan tecnologico, cierto procesonan laboral ta rekeri menos trahado. Personanan cu a perde nan trabou, tin biaha mester busca trabou den un otro sector. Falta di e habilidadnan rekeri pa cuponan di trabou den un sector diferente, y falta di posibilidad pa adkiri e habilidadnan aki ta conduci na desempleo structural.
• Desempleo di friccion: Desempleo di friccion ta resulta door di personanan cambiando trabou den e mercado laboral y door di personanan den transicion, drentando of saliendo di e forsa laboral. Un ehempel ta ora cu un persona kita for di un compania pa bay busca trabou un otro caminda, of ora un studiante caba di gradua y ta buscando trabou. E proceso di busca y aplica pa un trabou ta tuma su tempo, cual ta conduci na desempleo di friccion.

Cuantificacion di desempleo

Un di e indicadornan principal di desempleo ta e tasa di desempleo. E tasa di desempleo ta wordo defini como e cantidad di personanan den desempleo dividi door di e forsa laboral. E forsa laboral, na su turno, ta referi na e suma di personanan den empleo y personanan den desempleo.

$$\begin{split}\text{Tasa di desempleo}&=\frac{\text{personanan den desempleo}}{\text{forsa laboral}}\\&=\frac{\text{personanan den desempleo}}{\text{personanan den empleo} + \text{personanan den desempleo}}\end{split}$$

E tasa di desempleo ta duna un indicacion di e economia su habilidad pa utilisa tur persona cu kier traha y no ta trahando, aunke nan ta disponibel pa traha y ta activamente buscando trabou.

Desempleo na Aruba

Aki na Aruba, e tasa di desempleo ta wordo publica door di Directie Arbeid en Onderzoek (DAO). A base di diferente encuesta, entre otro, censo y e encuesta laboral, ta compila datonan pa calcula e tasa di desempleo.

Cifranan di desempleo y otro indicadornan relata na e mercado laboral ta disponibel aki:
Mercado laboral na Aruba 2010 - 2020 (DAO, Centraal Bureau voor de Statistiek Aruba (CBS), Centrale Bank van Aruba (CBA))

Kiko mi a siña?

• Definicion di desempleo (ILO).
• Clasificacion di desempleo.
• Definicion y calculacion di tasa di desempleo.