Impuesto

Impuesto ta un pago obligatorio na gobierno, pa cual e pagado no ta ricibi un beneficio directo a cambio. Su proposito principal ta pa genera entrada pa gobierno. Como e fuente primordial di entrada pa e gobierno di un pais, e ta yuda cubri e gastonan publico cu ta wordo haci. Akinan por pensa, por ehempel, riba gastonan relata na infrastructura, scolnan publico y servicionan social.

Tin diferente tipo di impuesto. Esakinan por wordo categorisa bou di 'impuesto directo' y 'impuesto indirecto'.

Impuesto directo ta referi na un tipo di impuesto cu no por wordo transferi na un otro persona of organisacion. Un ehempel di e tipo di impuesto aki ta impuesto riba salario, e asina yama "loonbelasting". Cada persona cu ta traha, ta paga un porcentahe di su salario na gobierno.

Impuesto indirecto, di otro banda, ta un tipo di impuesto cu ta wordo impone riba un persona of organisacion, pero cu finalmente ta wordo paga door di un otro. Un ehempel di e tipo di impuesto aki ta e "Belasting op Bedrijfsomzetten" (B.B.O.). Den e caso aki, empresanan/ empresarionan ta paga un porcentahe di nan entrada genera door di benta di producto of servicio na gobierno. Sinembargo, e impuesto aki ta wordo inclui den e prijs di productonan y servicionan bendi, pa cual finalmente, e consumidor ta esun cu ta paga e impuesto aki.

Kiko mi a siña?

• Kico ta impuesto.
• Dicon impuesto ta wordo paga.
• Diferencia entre impuesto directo y impuesto indirecto.