Placa

Placa ta referi na un producto cu ta wordo ampliamente acepta como pago final pa productonan y servicionan.

Placa tin diferente funcion:

• Reserva di balor: Placa ta wordo considera un producto eficiente pa wanta balor. Esaki ta debi cu en general, su balor ta keda stabiel pa un periodo extenso. Ta importante pa tene na cuenta si, cu aunke wanta placa ta wordo considera un manera eficiente pa wanta balor, e no ta un manera perfecto di wanta balor, debi cu inflacion ta baha e poder di compra di placa durante tempo.
• Unidad di cuenta: Placa ta sirbi como e midi comun di balor den e economia. Esta, e ta e unidad den cual e balor di otro productonan y servicionan ta wordo expresa.
• Medio di intercambio: Placa ta wordo ampliamente acepta como metodo di pago.

Aki na Aruba nos tin placa fiat. Placa fiat ta placa cu tin un balor intrinsico cu ta menos cu e balor cu e ta representa como placa. Placa fiat su balor ta basa riba e hecho cu e a wordo declara como un forma di pago legal y debi cu e ta wordo suficientemente balora y acepta como forma di pago.

Kiko mi a siña?

• Kico ta placa?
• Funcionnan di placa.
• E tipo di placa cu tin na Aruba: Placa fiat.