Producto Domestico Bruto

Producto Domestico Bruto (PDB) ta un midi cu ta wordo uza pa determina e magnitud y estado di un economia. Specificamente, PDB ta midi e balor monetario di tur producto y servicio final produci den un pais durante di un periodo.

Productonan y servicionan final ta esunnan cu ta wordo cumpra pa consumo. Contrario na productonan y servicionan intermedio, nan no ta wordo uza pa produci otro producto of servicio.

Tin diferente manera pa calcula PDB:

• Por suma tur entrada genera door di e factornan di produccion den un economia.
• Por suma tur gasto pa compra di productonan y servicionan produci den un economia.
• Por suma e balor agrega na diferente fase di produccion di tur producto y servicio produci den un economia.

PDB por wordo expresa den termino nominal y den termino real:

1. Nominal

   PDB nominal ta midi e balor monetario di tur producto y servicio final produci den un pais durante di un periodo, calcula a base di prijsnan actual den mercado.

2. Real

   PDB real, na su turno, ta midi e balor monetario di tur producto y servicio final produci den un pais durante di un periodo, teniendo na cuenta e efecto di inflacion of deflacion cu por tuma luga durante tempo. Esaki ta refleha actividad economico den un pais na un manera mas preciso.

Ta importante pa tene na cuenta cu tin cierto produccion cu PDB no ta midi, por ehempel, produccion cu ta tuma luga na cas (pa consumo propio). Debi cu e productonan y servicionan aki no ta wordo bendi riba mercado, e transaccionnan relata na nan no ta wordo captura.

Kiko mi a siña?

• Kico ta PDB.
• Diferente manera pa calcula PDB.
• E diferencia entre PDB nominal y PDB real.