Riesgo sistemico

Riesgo sistemico ta referi na e posibilidad cu un incidente na un compania ta causa instabilidad den henter un industria of economia.

Riesgo sistemico por wordo causa door di:

• Un compania cu ta relativamente grandi compara cu e industria den cual e ta opera.
• Un compania cu ta eherce actividad economico cu ta forma un parti significante di un economia.
• Un compania cu ta altamente conecta cu otro companianan.

Problema na un compania cu por causa riesgo sistemico, por ta desastroso pa un economia. Pa e motibo aki, gobiernonan sa rescata e tipo di compania aki ora tin problema. Un gobierno por provee placa of otro recurso pa yuda preveni e consecuencianan negativo cu por tin, entre otro:

• Desempleo: Desempleo por conduci na un reduccion den consumo, menos entrada (impuesto) pa gobierno y mas costo pa e sistema di seguro social.
• Instabilidad economico: Si e compania den problema no por cumpli cu su obligacionnan financiero cerca otro companianan, e falta di entrada cerca e otro companianan por haci nan tambe incapaz pa cumpli cu nan obligacionnan financiero. Esaki por causa problema cerca mas compania y daño economico mas grandi.
• Complicacion legal: Un compania den problema por trece varios complicacion, particularmente si e compania tin hopi debe of otro obligacion. Den un situacion asina, por tin procedementonan legal largo y costoso envolvi.

Kiko mi a siña?

• Nificacion di riesgo sistemico.
• Posibel causa di riesgo sistemico.
• Posibel consecuencianan di riesgo sistemico.