Tasa di interes
E tasa di interes, simplemente poni, ta e costo di credito.
Pa un persona of organisacion cu kier haci un prestamo, e tasa di interes ta indica con hopi e persona of organisacion aki lo wordo cobra pa e prestamo. Pa un persona of organisacion cu ta spaar, e tasa di interes ta indica con hopi e persona of organisacion aki lo wordo recompensa pa spaar.
E tasa di interes ta wordo expresa como un porcentahe di e cantidad total cu ta wordo presta of spaar. Mas halto e tasa di interes ta, mas caro e prestamo ta, y mas hopi e recompensa pa spaar ta.
Tin diferente factor cu ta determina con halto of abou e tasa di interes ta. E factornan aki, entre otro, ta refleha e riesgonan mara na e servicio di pone placa na disposicion di personanan of organisacionnan cu kier presta esaki. Por pensa ariba:
- E cantidad di placa cu tin disponibel pa duna credito.
- E capacidad di esun cu ta presta pa cumpli cu e pagonan riba e prestamo.
- Inflacion
E tasa di interes por wordo expresa den termino nominal y den termino real. E tasa di interes nominal ta e interes cu ta wordo indica como e costo di un prestamo of recompensa pa spaar. E tasa di interes real ta e tasa di interes nominal, kitando e tasa di inflacion.
Dependiendo di inflacion, por tin un diferencia substancial entre e tasa di interes nominal y e tasa di interes real. Por ehempel, aunke e tasa di interes nominal por ta positivo, e tasa di interes real por resulta di ta negativo.
Ehempel:
| Tasa di interes nominal | Inflacion | Tasa di interes real |
|---|---|---|
| 5% | 3% | 2% |
| 3% | 3% | 0% |
| 1% | 3% | -2% |
Den e ehempel aki, unda e tasa di inflacion ta 3%, y e tasa di interes nominal ta 5%, e poder di compra di placa cu wordo gespaar ta crece cu 2%. Si acaso e tasa di interes nominal ta 3%, e poder di compra di placa gespaar ta keda igual. Den e caso cu e tasa di interes nominal ta 1%, e poder di compra di placa gespaar ta baha cu 2%.
Kiko mi a siña?
- Nificacion di tasa di interes.
- 3 factor cu ta determina e magnitud di e tasa di interes.
- Diferencia entre e tasa di interes nominal y e tasa di interes real.