E mas recien Cuentanan Nacional di Aruba: 2018 - 2019

Na luna di februari 2023, e Oficina Nacional di Estadistica di Aruba a publica cifranan oficial di Aruba su producto domestico bruto (PDB) pa aña 2018 (definitivo) y 2019 (preliminar).

E cifranan publica ta duna informacion tocante e structura y funcionamento di e economia Arubano, durante e añanan menciona.

PDB y su componentenan

Na 2018, e PDB di Aruba a suma Afl. 5,864 miyon, marcando un crecemento di 5.9% compara cu 2017. Na 2019, e PDB di Aruba a crece cu 3.7% compara cu 2018, y a yega Afl. 6,078 miyon.

Pa loke ta e componentenan di PDB, consumo final, consistiendo di consumo di hogarnan y consumo di gobierno, a crece durante 2018 y 2019.

Inversion tambe a crece den tur dos aña. Gran parti di e crecemento den inversion a wordo causa door di inversion priva. E desaroyo aki ta refleha e magnitud di inversion priva compara cu inversion publico. Durante e añanan 2018 y 2019, inversion total a consisti pa 96% di inversion priva y 4% di inversion publico.

Durante 2018, Aruba a importa mas cu e a exporta, resultando den importacion netto na balor di Afl. 41 miyon.

Na 2019, Aruba a exporta mas cu e a importa, resultando den exportacion netto na balor di Afl. 68 miyon. Turismo tabata e contribuyente principal na exportacion durante 2019.

Industrianan principal di e economia Arubano

Si considera e proporcion di e diferente industrianan den e economia Arubano durante e periodo 2015 - 2019, por nota cu e industrianan mas grandi di e economia Arubano ta:

1. Actividad di alohamento y servicio di cuminda: Na 2019, e industria aki a representa 17% di PDB. Turismo ta e contribuyente principal na e industria aki, cu ta consisti di varios hotel y restaurant.
2. Administracion publico, defensa y seguro social obligatorio: E di dos industria mas grandi ta gobierno di Aruba, cu a representa 10% di PDB na 2019.
3. Comercio: E industria aki a representa 9% di PDB na 2019.

Di otro banda, e industria mas chikito di e economia Arubano ta agricultura, representando solamente 0.03% di PDB na 2019. E tamaño chikito di e industria aki ta refleha e hecho cu na Aruba mayoria producto di alimentacion ta wordo importa, mientras produccion local ta minimal. Tin cu subraya si cu e industria aki a conoce un crecemento excepcional di 28.4% na 2019.

E publicacion completo ta disponibel aki: https://cbs.aw/wp/wp-content/uploads/2023/01/GDP-publication-2018-2019_VERSION_Feb1_23.pdf