Proyeccionnan economico pa Aruba: 2022

Durante e ultimo kwartaal di aña 2021, Departamento di Asunto Economico, Comercio y Industria di Aruba (DEACI), y Banco Central di Aruba (BCA) a publica nan proyeccionnan economico pa aña 2022.

E proyeccionnan aki a resulta for di e modelonan macroeconomico di e organisacionnan, cu ta construi pa refleha e funcionamento di e economia Arubano.

DEACI

Compara cu aña 2021, DEACI ta pronostica un crecemento di entre 0.9% y 10.1% den e Producto Domestico Bruto (PDB) nominal di Aruba.

BCA

Compara cu aña 2021, BCA ta pronostica un crecemento di entre 6.8% y 17.3% den e PDB nominal di Aruba. Esaki ta coresponde cu un crecemento di entre 3.1% y 12.0% den termino real.

Splicacion

E resultadonan di ambos organisacion ta wordo spera primordialmente a base di expectativanan positivo den exportacion relata na turismo y inversion.

Pa loke ta exportacion relata na turismo, ta premira un recuperacion continuo den e sector di turismo.

E crecemento den inversion ta wordo spera a base di un subida den inversion priva. E subida aki ta basa riba e expectativa cu proyectonan di inversion planea pa 2020 y 2021 cu a sufri retraso, lo tuma luga den 2022. Pa loke ta inversion publico, ta spera un caida.

Nota

Ta importante pa tene na cuenta cu e resultadonan presenta ta proyeccionnan hasi a base di modelonan macroeconomico. E cifranan final di crecemento economico pa Aruba ta e cifranan cu ta resulta for di e Cuentanan Nacional. Esakinan ta wordo calcula y publica door di e Oficina Nacional di Estadistica di Aruba.

E rapport completo di DEACI ta disponibel aki: https://www.deaci.aw/wp-content/uploads/2021/11/Final-Economic-Outlook-2021-2023-Oct-292021.pdf

E rapport completo di BCA ta disponibel aki: https://www.cbaruba.org/readBlob.do?id=10738

Cifranan di Cuentanan Nacional ta disponibel aki: https://cbs.aw/wp/index.php/2021/02/22/gdp-data-series-2000-2018/