E economia informal na Aruba

Sociaal Economische Raad (SER) van Aruba, un organo independiente cu ta duna conseho encuanto cuestionnan socioeconomico na gobierno di Aruba, a publica un rapport tocante e economia informal na Aruba.

Kico ta wordo considera economia informal?

Di acuerdo cu e definicion estableci door di e Organisacion Internacional di Labor (ILO), e rapport di SER ta defini 'economia informal' como: "Tur actividad economico haci door di trahadonan y unidadnan economico cu no ta wordo cubri (suficientemente) door di areglonan formal (a base di ley of practica)."

Basicamente, ta trata di actividadnan cu tin balor ariba mercado, pero cu no ta wordo registra, y ariba cual consecuentemente impuesto y primanan di siguridad social no ta wordo paga. Por pensa, por ehempel, ariba trabounan di reparacion haci door di un conoci en cambio di placa. Un otro ehempel ta bendemento di productonan via medionan social, door di personanan cu no tin un negoshi oficialmente registra na Camara di Comercio y Industria.

Ki factornan por contribui na e existencia di un economia informal?

E rapport di SER ta menciona 10 diferente factor treci dilanti door di ILO, cu por contribui na e existencia di un economia informal. Entre otro:

• Nivel di educacion abou: Falta di educacion pa por funciona den e economia formal y falta di reconocimento pa habilidadnan adkiri den e economia informal, ta fungi como barera pa trahadonan forma parti di e economia formal.
• Falta di acceso na recursonan economico: Tin diferente gastonan envolvi den establece un compania y registra esaki formalmente. Falta di acceso na recursonan economico por pone cu debi na e gastonan envolvi, ta opta pa opera un compania sin registra esaki formalmente.

Ki consecuencianan un economia informal por trece cu ne?

E existencia di un economia informal tin su consecuencianan pa diferente gruponan den comunidad. Di acuerdo cu ILO, e rapport di SER ta discuti consecuencianan pa:

• Trahadonan: Trahadonan activo den e economia informal no ta wordo reconoci, registra, regula, of proteha door di leynan laboral ni door di e sistema di siguridad social.
• Companianan: Companianan activo den e economia informal ta competi den un manera inhusto cu companianan registra formalmente. Gastonan di companianan cu ta forma parti di e economia informal por ta mas abou cu gastonan di companianan formalisa, debi cu nan no ta contribui cu, entre otro, pagonan di impuesto y primanan di siguridad social.
• Gobierno: Debi cu companianan activo den e economia informal no ta contribui cu impuesto, gobierno ta perde entrada cu por wordo uza pa cubri gastonan publico cu ta wordo haci, manera, gastonan relata na infrastructura, scolnan publico y servicionan social.

Con grandi e economia informal na Aruba ta?

E rapport di SER ta presenta resultadonan di un estudio cu Departamento di Asunto Economico, Comercio y Industria di Aruba (DEACI) a haci, pa midi e grandura di e economia informal na Aruba (Grafico 1). E resultadonan di e estudio aki ta mustra cu entre aña 1990 y aña 2019, e grandura di e economia informal na Aruba a varia entre 4.8% y 22.4% di e producto domestico bruto (PDB) di Aruba.

Na aña 1990, e economia informal tabata 21.0% di e PDB di Aruba. E porcentahe aki a bin ta baha gradualmente durante e añanan, yegando su punto mas abou (4.8%) na aña 2004. Despues di esaki, atrobe e porcentahe aki a bin ta crece, yegando su punto mas halto (22.4%) na aña 2017. E grandura promedio di e economia informal na Aruba durante e periodo 1990 - 2019, a wordo calcula na 13.0% di e PDB di Aruba.

Ta di remarca si, cu a base di un comparacion haci cu otro islanan den Caribe y islanan cu igual na Aruba ta dependiente di turismo, pa e añanan 2012 - 2017, e economia informal na Aruba ta mustra di ta relativamente chikito (Grafico 2).

Nota

Banda di e informacion presenta den e articulo aki, e rapport di SER ta contene resultadonan di entrevistanan haci cu gruponan activo den e sector formal y e sector informal di Aruba. E rapport ta inclui tambe SER su recomendacionnan pa promove un reduccion di e sector informal na Aruba.

E rapport completo di SER ta disponibel aki: https://www.ser.aw/pages/wp-content/uploads/2021/12/Advies-Informele-economie-op-Aruba-Nov-2021.pdf