Cantidad di placa den circulacion

E cantidad di placa den circulacion ta referi na monedanan y tur otro instrumento financiero likido cu tin den un economia durante di un periodo.

Instrumentonan financiero likido ta productonan financiero cu den corto tempo y facilmente por wordo converti na placa. Por ehempel, saldonan riba cuentanan coriente, saldonan riba cuentanan di spaar, bononan y cierto “stocks”.

E cantidad di placa den circulacion den un economia por afecta diferente aspecto economico, entre otro, inflacion y e ciclo comercial.

Un aumento den e cantidad di placa den circulacion generalmente ta baha e tasa di interes, cual tin un efecto positivo riba inversion y e cantidad di placa cu tin den man di consumidornan. E desaroyo aki ta stimula compra di producto y servicionan. Companianan ta responde na e demanda adicional aki door di hisa produccion. Mas actividad commercial, na su turno, ta hisa e demanda pa labor.

Un bahada den e cantidad di placa den circulacion generalmente ta hisa e tasa di interes, cual ta haci e costo di prestamo mas caro. Debi cu ta bira mas caro pa presta placa, menos inversion ta wordo haci y consumidornan en general tin menos placa den nan man. Consecuentemente, tin menos demanda pa productonan y servicionan. E desaroyo aki ta pone cu companianan no tin e necesidad pa hisa produccion of pa hisa e cantidad di cuponan di trabou.

Kiko mi a siña?

• Kico ta 'cantidad di placa den circulacion'.
• Kico ta 'instrumentonan financiero likido'.
• Posibel efectonan di cambionan den e cantidad di placa den circulacion.